Educación, Paz e Ilustración
O calendario escolar destaca como datas especiais do mes de xaneiro: o Día Internacional da Educación (24/01) e o Día Escolar da non Violencia e da Paz (30/01). Este último coincide co Día da Ilustración, data destacada no calendario do Libro e a Lectura 2025, dedicado a Xosé Vizoso.
O Día Internacional da Educación foi proclamado pola Asemblea Xeral das Nacións Unidas o 3 de decembro de 2018 e é celebrado cada 24 de xaneiro. Este día foi creado para subliñar a importancia da educación no desenvolvemento sostible e a paz.
A Educación para a Paz debe estar presente todos os días do ano, pero faise especialmente visible nas escolas cada 30 de xaneiro. O Día Escolar da non Violencia e da Paz é unha xornada que se empezou a levar a cabo en España en 1964 polo poeta e pacifista mallorquino Llorenç Vidal e que coincide co aniversario da morte de Mahatma Gandhi.
Todas as tipoloxías de bibliotecas (públicas, escolares, universitarias, especializadas e nacionais/rexionais) teñen un papel fundamental na consecución dos Obxectivos de Desenvolvemento Sostible da Axenda 2030. A través das súas coleccións, servizos e actividades con usuarios, as bibliotecas contribúen a construír unha sociedade cada vez mellor informada, máis igualitaria, solidaria e xusta, plenamente consciente da necesidade de levar un modo de vida sostible como compromiso coas xeracións futuras.
Desde a biblioteca escolar propoñemos unha serie de actividades, que complementan a selección de fondos bibliográficos da exposición “Educación, Paz e Ilustración”.
- Reflexionar sobre o que é vivir en paz, podendo utilizar como punto de partida a lectura dalgún dos libros da biblioteca sobre esta temática.
- Crear un Abecedario da Paz, en formato de dicionario ilustrado, con palabras como: amor, bicos, compartir, dialogar, ensinar, familia…
- Reinterpretar o “Guernica” de Pablo Picasso, levando a cabo nosa propia visión da obra con diferentes técnicas, materiais e cores.
- Ante unha pregunta como: “Cando pensas na Paz que ves?”, ilustrar a nosa resposta e conformar un mural conxunto.
- Transformar o sentimento que aparece nun cadro ou ilustración por outro.
- Construír o noso propio “océano Paz-ífico” no que cada pinga sexa unha proposta para un mundo mais sostible, igualitario, inclusivo e sen guerras.
- Crear poemas e haikus sobre a paz e recitalos.
- Facer un videoclip coa canción “Móvete” de Paco Nogueiras.
- Debuxar a canción “Imagine” de John Lennon