MEDIADORES_DÍAZ CASTRO

Todo avanza. O noso xeito de traballar, ao longo destes anos deunos a experiencia suficiente para mellorar o proceso.

Este é o motivo fundamental para facer un cambio importante: a nosa axenda de traballo.

Podedes consultar aquí o documento recentemente aprobado!

Durante o primeiro trimestre deste curso 2024/25, o equipo de mediación estivo moi activo:

• Difundiu o servizo entre o alumnado e o profesorado.
• Asistiu ás titorías para explicar o proceso de mediación, de cara a ofrecer axuda na resolución de conflitos.
• Formouse, coa asociación Aventeira, para mellorar a comunicación e explorar novas solucións aos conflitos.
• Fixo formación entre iguais, axudando aos alumnos de 5º e 6º do CEIP de Parga e de 6º do CEIP de Lagostelle.
• Iniciou intervencións con alumnado en conflito.

O pasado mércores, día 4 de decembro, o noso Equipo de Mediación recibiu a formación anual a cargo, como é habitual, da Asociación Aventeira (@aventeira.coop).

A sesión tivo, no primeiro momento, aos novos mediadores (2º ESO e Grao Básico de FP) como protagonistas. Despois, na sesión xeral, practicamos a comunicación non violenta, a busca de solucións creativas e a mediación como proceso.

Unha sesión moi interesante que se complementará, máis adiante, para aprender a análise doutras situacións, agora que o Equipo de Mediación, tamén, é un Axente de Benestar.

Grazas, mediadores e mediadoras!

O pasado curso o noso alumnado mediador comezou un labor de formación entre iguais cos nenos e nenas de 5º e 6º de primaria no cole de Parga.

Agora toca continuar co propósito!

Pasaremos a mañá alí o día 12 de decembro.

Iniciado o proceso de formación entre iguais o pasado curso no cole de Parga, este ano os nosos mediadores e mediadoras continúan o labor de difusión do seu labor axudando aos nenos máis pequenos a coñecer esta modalidade de resolución de conflitos.

No CEIP de Lagostelle esta formación terá lugar en dúas fases:

1. O día 15 de novembro estaremos por alí para unha primeira aproximación cos nenos e nenas de 6º e as súas titoras.

2. O día 19 de decembro voltaremos, xa, cunha sesión máis formativa, con dinámicas de participación. 

Encargaranse deste evento formativo Johnny e Aldara de 4º de ESO!