A Prehistoria é un período da humanidade que é común en todo Europa sendo as diferentes manifestacións artísticas patrimonio da humanidade. A través da saída ó Parque Arqueolóxico de Campo Lameiro o alumnado de 2º ciclo puido coñecer esta parte tan importante das orixes do ser humano a través de petroglifos,participaron nun obradoiro de cerámica e observaron como se facía o lume nesa época.

Ver imaxes e Vídeo

Ao longo deste curso tivemos a oportunidade de formar parte dun proxecto moi especial: Alianza Atlántica (Alimmoù Atlantel).

Trátase dun intercambio cultural e lingüístico entre Galicia e Bretaña que nos permitiu mergullarnos nas riquezas das nosas culturas e compartir identidades máis alá do Atlántico. Este proxecto foi unha viaxe de descubrimento e aprendizaxe, onde o alumnado de ambos os territorios se achegou á lingua propia do outro, abrindo portas para entender mellor as súas raíces e tradicións. Comezamos creando vídeos de presentación individuais, onde cada un e cada unha compartiu un pouco de si mesma para que as crianzas de Plouarzel nos coñezan.

Despois, puxémonos mans á obra traducindo as súas presentacións do bretón ao galego, unha tarefa que nos axudou a comprender mellor a súa lingua. Tamén elaboramos unha presentación do noso colexio, para amosar quen somos e como vivimos o día a día na nosa aula. A música e as lendas foron outras protagonistas; gravamos dous podcast no que falamos das melodías, instrumentos e historias que forman parte do noso patrimonio cultural. Non todo foi palabras, tamén quixemos poñer a man na masa, literalmente. Deseñamos un xogo de memoria cos produtos típicos da gastronomía galega, feito cunha impresora e cortadora láser, na que empregamos o galego e o bretón.

Ademais, preparamos 2 pratos tradicionais de Breizh as galettes prato salgado con fariña de sarraceno e catro cuartos. Que degustamos nós e compartimos coas familias na presentación do PDI Museo Paparouta. As galette son unha especie de filloa salgada feita con trigo sarraceno, unha semente moi empregada en Breiz sen gluten. Ademais na nosa horta sementamos esta planta para coñecer o seu proceso de crecemento.

A outra proposta é o biscoito catro cuartos co que puidemos traballar as proporcións e fraccións así como o peso. Para pechar con broche de ouro esta experiencia, participamos nun obradoiro de danza e música bretoa, onde nos deixamos levar polos movementos e ritmos que nos achegaron un pouco máis á cultura dos nosos amigos e amigas de Ploarzhel.

https://www.plouarzel.fr/

Descargar Receita de repostería

Ver Imaxes e vídeos

Ola tribo aí vai unha nova mestura de momentos, propostas de aprendizaxe, accións reivindicativas... unha boa ensaladilla para ir rematando este ciclo.

Lingua con sabor a xogo: Traballamos os tipos de palabras cun bingo de descricións, mesturando o lúdico e a reflexión. A calor. Preguntámonos como viaxa a calor, como se conserva, e que materiais son bos condutores ou illantes. Fixemos experimentos co tacto e co tempo. Botamos auga quente en recipientes de diferentes materiais e medimos a temperatura ao comezo e transcorridos 10 minutos descubrindo así cales mantiñan mellor a temperatura. Tocamos obxectos de distintos materiais (vidro, cerámica, metal, aluminio, tea, cartón e madeira) logo de mergullalos en auga quente e descubrimos que a ciencia tamén se sente coas mans, puidemos valorar que materias son condutores e cales illantes. Isto levámolo á vida cotiá na cociña e entendemos por exemplo por que a tixola é de metal e o mango de plástico. A vida cotiá tamén é un laboratorio.

A materia: cambios físicos e químicos. Reversibles e irreversibles. Xunto a Arenaria mergullámonos no mundo da materia a súa composición e cualidades e logo puxémola en práctica con propostas culinarias para comprender os cambios físicos e químicos, reversibles e irreversibles. Cada parella escolleu unha das receitas propostas, presentouna e fixemos a nosa hipótese, cociñou co pensamento científico activado:

• Bombóns de chocolate partindo de chocolate líquido.
• Cubiños de zume de laranxa.
• Pipocas de millo .
• Ovo cocido .
• Caramelo.
• Vinagreta.

E comprobamos se a hipótese sobre o tipo de cambio que se produciu era acertada ou non.

Fraccións para repartir sabor: As pizzas ficticias axudáronnos a comprender o mundo das fraccións. Repartimos ingredientes, dividimos porcións e fixemos contas... que tamén se poden comer coa imaxinación. Saída a Carregal-Corrubedo. Fixemos tamén unha saída acompañadas por Arenaria na que coñecemos máis sobre o ecosistema dunar, paseamos e petiscamos entre dunas cheas de vexetación e puidemos recoller, observar e devolver algúns invertebrados deste ecosistema.

Nós tamén xogamos. As nenas da aula promoveron unha acción na que implicaron ás nenas do ciclo para reivindicar o seu lugar no campo e nos partidos de fútbol onde senten que ou ben son directamente apartadas ou se as deixan participar non as inclúen realmente sen ter apenas oportunidades de tocar o balón. Para visibilizar esta situación decidiron ocupar o campo con pequenos cartaces de onde se lía: Nós tamén xogamos e se vían imaxes de xogadoras profesionais, tamén algún compañeiro se sumou cun cartaz de Elas tamén xogan. Isto rematou cun partido no que realmente todas e todos puideron xogar.

Como vedes este final de curso está saírnos moi saboroso!

Continuamos!

Ver imaxes e vídeos

Ola tribo, vimos a compartir un dos proxectos que andivemos asando este trimestre.

Puxemos o foco nun tema que nos toca de preto e que está cheo de aprendizaxes valiosas e necesarias: a alimentación e o seu impacto no planeta.

A través do proxecto “Plástico con patacas”, afondamos nesta cuestión dende tres grandes eixos que guiaron todo o noso traballo: o envasado e o uso do plástico, a pegada hídrica e de carbono dos alimentos e o desperdicio alimentario. Comezamos explorando o primeiro eixo: o plástico.

Fomos o súper e anotamos e fotografamos os produtos que están envasados con plástico. Investigamos que ocorre cos envases despois de usalos, os perigos que supoñen para o mar e para a vida mariña, e reflexionamos sobre se realmente todos son necesarios.

Grazas ás entrevistas coas nosas avoas e avós, descubrimos moitas alternativas que se empregaban antes: papel, pano, cristal... Con iso puidemos identificar cales son plásticos imprescindibles e cales prescindibles.

Para poñer conciencia no uso excesivo de plástico calculamos o plástico que se xeran o día as merendas dos nenos e nenas de Barouta: pesamos o plástico xerado nas aulas de primaria, calculamos a media por aula e calculamos cal sería o total estimado do centro: 1,5 kg, isto supón un gasto de auga diario de 3.000l.

Esta parte completouse cunha xornada de recollida de lixo na praia da man da asociación AMICOS, unha experiencia que nos axudou a tomar conciencia do moito que tardan os plásticos e desaparecer, dos moitos que hai e do pouco coidadosas que somos as persoas.

A partir de todo o recollido creamos unha intervención artística de denuncia chamada “Do prato á mesa”, elaborando pratos e propostas gastronómicas ficticias a partir de refugallos plásticos.

O segundo eixo levounos a analizar a pegada de carbono e hídrica dos alimentos: cantos recursos consome o que comemos? De onde vén? Que custe ambiental ten a súa produción, transporte ou envasado? Que alimentos teñen unha maior pegada e cales menor?

Por último, traballamos sobre o desperdicio alimentario, un tema que nos impresionou especialmente. Descubrimos que, segundo datos de organismos internacionais un tercio da comida que se produce acaba no lixo, ademais do contaminante que isto resulta, co que se tira poderíase alimentar dúas veces á poboación mundial que pasa fame.

Tivemos a sorte de contar coa visita da ONG Acción contra a Fame, que nos axudou a entender mellor esta realidade e poñela en contexto global. Durante todo o proceso, fomos creando un mapa conceptual coas ideas clave, que nos permitiu ordenar o aprendido e compartir reflexións.

Como peche do proxecto, organizamos unha exposición para Museo Barouta, onde presentamos os nosos traballos e propostas á comunidade.

E como non queremos que quede todo en palabras, elaboramos entre todas e todos 10 propostas para aplicar no día a día e contribuír, dende o pequeno, a construír un mundo máis xusto e sostible.

Un proxecto que nos fixo mirar cun ollo máis crítico e consciente ao que comemos, ao que tiramos… e ao que podemos cambiar.

Ver Imaxes

Este foi un caldiño cocido na lareira a lume lento. Comezamos traballando sobre o propio corpo recoñecéndonos iguais e únicas, e enchendo cada corpo coa nosa historia: o que nos gusta o que non, as persoas queridas e importantes para nós, os libros, as viaxes, as anécdotas, as cicatrices...

Partindo de aí presentámonos para as nenas e nenas de Breizh e tamén preparamos unha presentación máis detallada e persoal para facer ante o grupo clase. Escollemos facela de xeito dixital ou analóxico, analizamos algunhas das presentacións empregadas na clase para ver a estrutura e elementos dunha presentación e agora estamos en proceso de compartirnos. Está a ser unha proposta moi motivadora e enriquecedora que se complementa coa dinámica: felicito, critico, propoño na que o alumnado recibe comentarios das súas compañeiras ou compañeiros respecto da presentación que permite entre todas mellorar e tamén recoñecer o traballo feito.

Ver Imaxes